سیدعارف بہار
ایسے میں جب اسرائیل اور سعودی عرب مدر آف آل ڈیلز کی دہلیز پر پہنچ چکے تھے فلسطین کی حریت پسند تنظیم حماس نے اسرائیل پر اچانک یلغار کر کے ’’مدرآف آل سرپرائز ز‘‘دے دیا ۔جس کے بعد عرب رائے عامہ ایک بار پھر خواب خرگوش سے بیدار ہوئی اورانہیں اندازہ ہوا کہ اسرائیل اس خطے کی ایک تلخ حقیقت ہے جس کی تلخی اور گھائوکو وقت کا بھائواور مرہم مندمل اورکم نہیں کر سکتا ۔ایسے مسائل تاریخ کے درست تناظر میں رہ کر کئے جانے والے فیصلوں سے ہی حل ہو سکتے ہیں ۔اسرائیل کے وزیر خارجہ نے بہت تمکنت کے ساتھ اعلان کیا تھا کہ سعودی عرب اور اسرائیل معاہدے کے قریب پہنچ چکے ہیں اور سعودی عرب کے اسرائیل کے ساتھ تعلقات قائم کرتے ہی چھ سات مسلمان ممالک بھی اسرائیل کے ساتھ تعلقات قائم کر لیں گے ۔اسرائیل کے وزیر خارجہ نے ان ملکوں کے نام ظاہر نہیں کئے تھے بلکہ صرف یہ کہنے پر اکتفا کیا تھا ان میں سے کئی ملکوں کے ساتھ اسرائیل کی ابتدائی بات چیت ہوچکی ہے ۔اسرائیل کے وزیر خارجہ کے اس اعلان کا مطلب یہ تھا کہ اب اسرائیل کو مسلمان دنیا سے تسلیم کروانے میں کوئی قابل ذکر رکاوٹ باقی نہیں رہی ۔سعودی عرب کے ساتھ بونس میں جانے چھ سات ملکوں میں پاکستان کا نام بھی لیا جانے لگا تھا ۔چند دن پہلے فلسطین کے صدر محمود عباس نے معنی خیز بات کی تھی کہ امریکہ فلسطین پر قبضہ کرنا چاہتا ہے۔محمود عباس نے اسرائیل کے قبضے کی بات نہیں کی بلکہ امریکہ کے قبضے کی بات کی تھی اور بہت سوچ سمجھ کر کی تھی ۔اس سے پہلے چین نے اسرائیل اور فلسطین کے درمیان مذاکرات میں سہولت کاری کی کوشش شروع کی تھی مگر یہ کوشش امریکہ کی خطے کے لئے بنائی گئی سکیم کے لئے خطرہ تھی اس لئے امریکہ نے سعودی اسرائیل تعلقات میں گرم جوشی پیدا کرنے کی کوششوں میں تیزی پیدا کر دی ۔یہاں تک کہ تاریخ میں پہلی بار ایک اسرائیلی وزیر نے سعودی عرب کا اعلانیہ دور ہ کیا ۔اس طرح سعودی عرب اور اسرائیل کے درمیان تعلقات کے قیام کا سٹیج تیار ہو چکا تھا اور سعودی عرب کے ساتھ’’ بائے ون گٹ سیون ‘‘ کے انداز میںجانے والے ممالک میں کچھ سیاسی اتھل پتھل اسی انداز سے جاری تھی ۔ایسے میں حماس نے اسرائیل پر یلغار کرکے ایک نئی تاریخ رقم کر دی۔یہ اپنی نوعیت کی انوکھی لڑائی ہے جو اسرائیل کے قلب میں لڑی جا رہی ہے اس سے پہلے عرب اسرائیل جنگیں اسرائیل سے باہرگولان کی پہاڑیوں اور سنائے کے علاقوں میں لڑی جاتی رہیں ۔گولان کی پہاڑیوں پر شام کے ساتھ جبکہ وادی سنائے کے علاقے میں مصر کے ساتھ لڑائی ہوئی تھی اور یہ دونوں علاقے اسرائیل کا باقاعدہ حصہ نہیں تھے۔ پہلی بار حماس نے اسرائیل کے اندر داخل ہوکر سارے رعب ودبدبے کو خاک میں ملادیا ۔
حماس نے بہترین جنگی مہارت کا مظاہرہ کرکے اسرائیل کو سرپرائز دیا اور اسی انداز میں اسرائیل کے گرفتار فوجیوں کو پیش کیا جس طرح اسرائیلی پچہتر برس سے فلسطینیوں کو تذلیل اور تضحیک آمیز انداز سے پیش کرتا چلا آتا ہے۔حماس کے حملے کے جواب میں اسرائیل نے فلسطینیوں پر قیامت برپا کی غزہ کی بلند وبالا عمارتوں اور بستیوں کو ملبے کے ڈھیر میں بدل دیا گیا ہے ۔غزہ نے اسرائیل کا محاصر ہ کر دیا ہے اور لاکھوں آبادی کو بھوک اور پیاس سے مارنے کا بندوبست کیا جا رہا ہے۔اقوام متحدہ نے اس محاصرے کو ختم کرنے کی اپیل کی ہے۔اس حملے کے بعد سعودی عرب نے اسرائیل کے ساتھ تعلقات کی نارملائزیشن کی ڈیل پر ہونے والی پیش رفت کوروک دیا ہے ۔سعودی وزیر خارجہ نے امریکی سیکرٹری آف سٹیٹ انٹونی بلنکن کو ڈیل کو آگے چلانے سے معذرت کی ہے۔اسرائیل کے جبر وتشدد کے بعد اب عرب رائے عامہ غم وغصے سے بھر گئی ہے اور اس ماحول میں سعودی عرب کے لئے اسرائیل کے ساتھ تعلقات کی نارملائزیشن کے ایجنڈے پر آگے بڑھنا ممکن نہیں ۔جس پر یہی کہا جا سکتا ہے کہ
قسمت کی دیکھئے کہ ٹوٹی کہاں کمند
دوچار ہاتھ جب لبِ بام رہ گیا
اب تو بات یہاں تک پہنچ گئی ہے کہ ایران کے صدر ابراہیم رئیسی اور سعودی شہزادے محمد بن سلمان کے درمیان ٹیلی فونک رابطے پر فلسطین کی صورت حال کا جا ئزہ لیا گیا ۔امریکہ اور اسرائیل نے فلسطین میں طاقت کا توازن اور سٹیٹس کو اس بنیاد پر قائم نہیں کیا کہ اسرائیل بہت طاقتور ہے بلکہ اس نے فلسطین کی تنہائی کو یقینی بنا کر ان پر اپنا دبدبہ اور قبضہ بحال رکھا ہے ۔فلسطینیوں کو تنہا کرنے کے اس عمل کا آغاز کیمپ ڈیوڈ معاہدے سے ہوا تھا جس میں فلسطین کے سب سے اہم معاون ملک مصر کو میدان سے نکال باہر کیا گیا تھا ۔بعد میں فلسطینیوں کے دوسرے ہمسائے اُردن کے ساتھ معاہدہ کرکے میدان کو مزید خالی کر دیا گیا ۔لے دے کر شام اورلبنان ہی فلسطین کے ایسے ہمسائے رہ گئے تھے جو ان کی تحریک کی زبانی کلامی حمایت برقرار رکھے ہوئے تھے اور شام میں رجیم چینج کی کوشش عرب سپرنگ میں کی گئی مگر یہ کوشش کامیاب نہ ہو سکی اور روس نے اپنے پرانے دوست فاطمی خاندان کے اقتدار کو بچالیا ۔مصر میں جونہی محمد مرسی کی صورت میں انہیں مستقبل کے خطرات کے سائے نظر آئے تو ایک سال کے اندر اندر محمد مرسی کا تختہ اُلٹ کر انہیں جیل میں ڈال کر آنے والوں کے لئے نشان َ عبرت بنادیا گیا۔فلسطین کے ہمسایوں کا سرینڈر اور ذہنی پسپائی اسرائیل کی طاقت کا راز رہا ہے ۔
اب سعودی عرب کے ساتھ تعلقات کے قیام کا ٹرمپ کارڈ کھیلنا باقی رہ گیا تھا اور اس کے بعد پاکستان سمیت کئی مسلمان ممالک پکے ہوئے پھل تعلقات کی جھولی میں جا گرنا تھے ۔حماس نے اس ساری بساط کو اُلٹ ڈالا ہے اور بے موت اور تنہا مارے جانے کے تصور کو بدل کر رکھ دیا ۔فلسطین اور کشمیرمیں کئی روابط رہے ہیں کشمیر کی مزاحمت کا ہر دور فلسطینی مزاحمت کی چھاپ لئے ہوتا ہے ۔ساٹھ اور ستر کی دہائی میں کشمیری مزاحمت پر فلسطین کی چھاپ نمایاں اور گہری تھی ۔
محمد مقبول بٹ اور ان کے ساتھ جہازوں کے اغوا کی منصوبہ بندی ،گوریلا حملوں ،جیلیں توڑ کر فرار ہونے کی منصوبہ بندی کرکے ابوندال لیلیٰ خالد اور غسان کنفانی کو آئیدیلائز کرتے رہے اور اسی کی دہائی میں حماس نے میدان سنبھال لیا تو کشمیر میں اسی طرز مزاحمت کو فروغ ملا۔یہاں تک ایک وقت میں پتھر اور غلیل کشمیری نوجوانوں کے مقبول ہتھیار بن گئے۔یہی مماثلت اور مطابقت اسرائیل اور بھارت کو اپنی اپنی تحریکوں سے نمٹنے میں تعاون کا راستہ اختیار کرنا پڑا۔کشمیر پر بھی ایک ڈیل کا سکرپٹ موجود ہے اور جس پر دستخط کرنے کا لمحہ آنے سے پہلے ہی کوئی دھماکہ ہوجاتا ہے اور یہ ڈیل رک جاتی ہے ۔کرگل اور وکلا تحریک کشمیر ڈیل کو اسی طرح اُڑاتے رہے ہیں جس طرح حماس نے اسرائیل کو مدر آف آل سرپرائزز دے کر مدر آف آل ڈیلز کوسردست ناکام بنا دیا ہے ۔حماس نے صرف سعودی اسرائیل ڈیل کو ہی نہیں پاکستان بھارت ڈیل کی منزل بھی دور کرنے کے ساتھ ساتھ پاکستان کی سیاسی حرکیات میں تبدیلی کے آثار بھی پیدا کر دئیے ہیں۔
٭٭٭
جناب سید عارف بہار آزاد کشمیر کے معروف صحافی دانشور اور مصنف ہیں۔کئی پاکستانی اخبارات اور عالمی شہرت یافتہ جرائدمیں لکھتے ہیں۔تحریک آزادی کشمیر کی ترجمانی کا الحمد للہ پورا حق ادا کر رہے ہیں ۔کشمیر الیوم کیلئے مستقل بنیادوں پر بلا معاوضہ لکھتے ہیں
