شہیدکمانڈر فاروق نعمانی

کشمیر کے بے شمار گھرانے ایسے ہیں جہاں قربانی ایک روایت بن چکی ہے۔ کہیں ایک چراغ بجھا، کہیں دو، اور کہیں تین تین چراغ ایک ساتھ گل ہوئےمگر ان گھروں کے حوصلے چراغوں کی طرح ہی روشن ہیں۔انہی استقامت کی داستانوں میں ایک باب ثناء اللہ میر کے گھر کا بھی ہےایک ایسا گھر جہاں ممتا نے صرف محبت نہیں، بلکہ حوصلہ بھی پروان چڑھایا۔ جہاں ماں کی گود نے صرف بچوں کو نہیں، بلکہ عزم و وفا کے پیکر تیار کیے۔ اسی گھر نے اپنے تین کڑیل جوان بیٹوں کو ایک عظیم مقصد کے لیے قربان کیا۔ یہ قربانی محض ایک سانحہ نہیں، بلکہ تاریخ کے ماتھے پر سجی ہوئی ایک روشن لکیر ہے۔تاریخ کی نظروں سے یہ تینوں شہید کبھی اوجھل نہیں ہوں گے۔ ان میں سے ایک شہید کے ساتھ کچھ وقت گزارنے کا شرف مجھے حاصل ہوا، جس کا حسین چہرہ آج بھی تروتازہ میری آنکھوں کے سامنے موجود ہے،معصومیت سے لبریز، مسکراہٹ سے مزین، اور خلوص سے بھرپور۔ اس کی آنکھوں میں ایک عجیب سی روشنی تھی، جیسے اندھیری رات میں کوئی چراغ جل اٹھے۔ اس کی سادگی میں ایک خاص کشش تھی۔ وہ وفا کا پیکر تھا، اپنے مشن سے جنون کی حد تک وابستہ تھا۔ اصل عظمت ان لوگوں کے حصے میں آتی ہے جو اپنے نظریے کے لیے خود کو مٹا دیتے ہیں۔ وہ جو اپنی ذات کی نفی کر کے ایک بڑے مقصد کی تکمیل کرتے ہیں، دراصل وہی وقت کے دھارے کو موڑ دیتے ہیں۔ ایسے کردار کبھی فنا نہیں ہوتےبلکہ وہ زمانے کے اندھیروں میں روشنی کے مینار بن جاتے ہیں۔شہید کمانڈر عبدالرشید میر المعروف فاروق نعمانیؒ بھی انہی درخشاں ستاروں میں سے ایک تھے جو حزب المجاہدین کے افق پر نمودار ہوا۔ ان کا تعلق وادیٔ کشمیر کے گاؤں لولی پورہ پٹن سے تھا،ایک ایسا گاؤں جو ہرطرف سےسیبوں کے خوبصورت باغات سے گھیرا ہواہے ۔کمانڈر فاروق نعمانی ؒنے ایک دیندار اور بااصول گھرانے میں آنکھ کھولی۔ جیسے ہی آپ نے جوانی کی دہلیز پر قدم رکھا، اس وقت پوری قوم بھارت کےخلاف صف آرا ہوچکی تھی ،تحریک آزادی کشمیر عروج پر تھی اور لوگ جوق درجوق اس میں حصہ لے رہے تھے۔ جب قوم نے اپنے دکھوں کو آواز دی، تو آپ نے اس صدا کو اپنے دل کی دھڑکن بنا لیا۔ آپ کا عزم ایک ایسے چراغ کی مانند تھا جو طوفانوں کے بیچ بھی بجھنے سے انکار کرتا ہے۔1990 کا دور آزمائشوں سے عبارت تھا،اسی برس آپ نے حزب المجاہدین میں شمولیت اختیار کرلی۔ برفانی راستے، گھنے جنگل، اور ہر قدم پر خطرا ت مگر آپ کے قدم ثابت رہے۔ آپ نے ان سختیوں کو اپنے عزم کی سیڑھیاں بنا لیا۔ یہ سفر صرف جسمانی مشقت نہ تھا، بلکہ روح کی تطہیر، صبر کی انتہا اور یقین کی معراج تھا۔1990میں آپ خونی لکیر عبور کرنے میں ان سخت آزمائیشوں کے بعد بالآخربیس کیمپ پہنچنے میں کامیاب ہوئے ۔بیس کیمپ میں زیادہ عرصہ نہیں گزارا بلکہ سخت عسکری تربیت حاصل کرنے کے بعد آپ وادی کی طرف ایک قافلہ سخت جاںکے ساتھ واپس لوٹے،آپ لوٹے تو آپ صرف ایک فرد نہ تھے بلکہ آپ ایک نظریہ، ایک استعارہ اور ایک روشن مثال بن چکے تھے۔ آپ کی زندگی ایک پیغام تھی، اور آپ کا وجود ایک تحریک۔آپ سات برس تک لگاتار بھارتی فوج کے خلاف برسر پیکار رہے ،اس دوران درجنوں کارروائیوں میں حصہ لے کر آپ دشمن پر کاری ضربیں لگاتے رہے ،ان کارروائیوں میں دشمن کو کافی نقصان سے دوچار ہونا پڑا۔کمانڈرفاروق نعمانی کے دو بھائی پہلے ہی شہادت پا چکے تھے۔انکے بڑے بھائی 1990 میں بیس کیمپ کی طرف تربیت کی غرض سے ایک گروپ کےساتھ نکلے تھے لیکن کپواڑہ کے سرحدی علاقے میں باڈر کراس کے دوران شہید ہوئے،ان کی لاش تک نہیں ملی۔پھر 1992 میں انکے چھوٹے بھائی اپنے ہی گاؤں میں حادثاتی طور پر بارودی سرنگ کی زد میں آکر شہید ہوگئے۔یقیناً اپنے دو بھائیوں کی جدائی نے انکا جگر چھلنی کیا ہوگا۔میدانِ کارزار میں سات برس تک انکے ماں باپ اور بہن بھائیوں کو بھی دشمنوں نے طرح طرح سے ستایا۔انکی اہلیہ اور انکے دو چھوٹے سے دودھ پیتے معصوم بچے بھی آزمائیشوں کی زد میں آئے اس دوران آپکی ایک ننھی سی بچی بھی حادثے کا شکار ہوئی اور اس نے موت کو گلے لگایا، آپ اپنے علاقے سے دور کسی جہادی مہم پر تھے کہ یہ انتہائی دلدوز خبربھی آ پ کو سنی پڑی آپ نے کمال صبر سے اس خبر کو سہہ لیا۔ لیکن ان آزمائیشوں سے آپ سرخرو ہوکر نکلے آپ کے پایہ استقلال میںکبھی لغزش نہیں آئی بلکہ،آپ ان حالات میں بھی ثابت قدم رہے اور تنظیم کی آبیاری کرتے رہے، مختلف وقتوں میں آپ نے تنظیمی سطح پر کئی ذمہ داریاںنبھائیں ، ان میں ایک بڑی ذمہ حزب المجاہدین کے مقامی نظم نے جوآپ کے کندوںپر ڈال دی،آپ کو علاقے کا بٹالین کمانڈر مقرر کیاگیا ۔ یہ دور کٹھن دور تھا جب بھارتی فوج نے مجاہدین کا زور توڑنے کے لئے جماعت اسلامی مقبوضہ جموں و کشمیر کو تختہ مشق بنانے کے لیے اخوان ملیشیا کو میدان میں لایا جنہیں بھارتی فوج کی طرف سے ہر قسم کاملٹری ولاجسٹک سپورٹ حاصل رہا ،مجاہدین کے لیے یہ دورایک کسوٹی تھی،بہت سے لوگ اخوان میں شامل ہونےلگے تھے ۔مجاہدین کے رابطے کمزور ہونے لگے تھے ،اس دوران آپ کو کچھ عرصے کے لیے وائرلیس سیٹ پر رابطہ کرنا مشکل ہورہا تھا، آپ ایک کمین گاہ میں کئی ماہ تک پھنسے رہے جس سے تنظیم کے ذمہ داروں میں بڑی بے چینی پیدا ہوئی تھی لیکن آپ نے صبر سے کام لیا ،بہترین وقت کا انتظار کیا اور کچھ ہی عرصہ بعد آپ نےایک بہترین منصوبہ سازی کرکے مجاہدین کو اکٹھا کیا اور اخوانیوں کی سرکوبی کے لئے کارروائیاں شروع کی جس میں آپ بڑی حد تک کامیاب رہے۔