ایک ملاقات… اور پھر جنازہ

حمزہ برہان کی گفتگو میں شعور بھی تھا، درد بھی اور اپنے وطن سے بے پناہ محبت بھی۔ میں اس کی باتیں سنتا رہا اور دل ہی دل میں اس نوجوان کی شخصیت سے متاثر ہوتا چلا گیا۔وہ رخصت ہوئے تو یہ طے کرکے اٹھے کہ ملاقاتوں کا یہ سلسلہ جاری رہے گا۔۔۔مگر کاتب تقدیر نے لوح محفوظ پر کچھ اور ہی لکھا تھا۔اس یادگار ملاقات کے بعد دوسری ملاقات اس کے جنازے پر ہوئی۔
وہی چہرہ… مگر خاموش
وہی آنکھیں… مگر ہمیشہ کیلئے بند
وہی وجود… مگر اب ایک بے جان جسم
آج بھی آنکھیں نم تھیں، مگر کیفیت مختلف تھی۔ اس دن خوشی کے آنسو تھے، آج رنج و الم کے۔ دل پر ایک بوجھ سا تھا، روح جیسے کسی گہرے کرب میں مبتلا تھی۔ جنازے کے ہجوم میں کھڑا میں بار بار خود سے یہی سوال کر رہا تھا
اسے قتل کیوں کیا گیا؟
اس کا قصور کیا تھا؟
کیا اس کا جوان ہونا جرم تھا؟
کیا اس کے خواب خطرہ تھے؟
یا پھر اس کا اپنے وطن سے محبت کرنا ناقابل معافی گناہ بن گیا تھا؟
یہ سوال صرف میرے ذہن میں نہیں، بلکہ ہر اس شخص کے دل میں گونج رہا ہے جو ظلم، جبر اور ناانصافی کے اس ماحول کو محسوس کرتا ہے۔ ایک زندہ، باشعور اور امید سے بھرپور نوجوان کو یوں خاموش کر دینا صرف ایک فرد کا قتل نہیں، بلکہ ایک سوچ ایک خواب اور ایک مستقبل کا قتل ہے۔
حمزہ برہان اب اس دنیا میں نہیں، مگر اس کی پہلی ملاقات کی مسکراہٹ اور آخری دیدار کا کرب زندگی بھر میرے دل میں زندہ رہے گا۔الوداع حمزہ ۔۔الوداع