قربانیوں کا تسلسل

عبدالقادر کی گرفتاری نے عوامی غم و غصے میں مزید اضافہ کردیا۔ جب ان کا مقدمہ سنٹرل جیل سرینگر میں چلایا جانے لگا تو ہزاروں لوگ جیل کے باہر جمع ہوگئے۔ 13 جولائی کو نمازِ ظہر کا وقت آیا تو ایک نوجوان اذان دینے کے لیے کھڑا ہوا، مگر اسے گولی مار دی گئی۔ اذان مکمل کرنے کے لیے دوسرا آگے بڑھا، وہ بھی شہید کردیا گیا۔ پھر تیسرا، چوتھا اور یوں ایک ایک کرکے بائیس نوجوان جامِ شہادت نوش کرتے گئے، مگر اذان کا سلسلہ نہ رکا۔ تاریخ کے صفحات میں یہ منظر ایمان، جرأت اور قربانی کی لازوال مثال کے طور پر محفوظ ہوگیا۔
اس سانحے نے کشمیر کے سیاسی منظرنامے کو ہمیشہ کے لیے بدل دیا۔ ظلم کے خلاف عوامی مزاحمت نے ایک منظم تحریک کی شکل اختیار کرلی۔ کشمیریوں کے دکھ درد اور ان پر ہونے والے مظالم عالمی سطح پر زیر بحث آنے لگے۔ یہ وہ لمحہ تھا جس نے آزادی کی جدوجہد کو نئی زندگی بخشی اور آنے والی نسلوں کے لیے ایک واضح راستہ متعین کردیا۔1931ء سے لے کر آج تک قربانیوں کا یہ سلسلہ رکا نہیں۔ لاکھوں افراد اپنی جانوں کا نذرانہ پیش کرچکے ہیں، ہزاروں معذوری اور اسیری کی زندگی گزارنے پر مجبور ہوئے، بے شمار خاندان ہجرت اور دربدری کے کرب سے گزرے، جبکہ بہت سے لوگ ایسے بھی ہیں جن کی قبریں آج تک نامعلوم ہیں۔ برف پوش پہاڑوں، ویران جنگلوں اور دور افتادہ علاقوں میں دفن ہونے والے یہ گمنام شہداء بھی اسی عظیم داستان کا حصہ ہیں۔
یومِ شہداء کا اصل پیغام محض تقریبات، جلسوں، جلوسوں اور نعروں تک محدود نہیں۔ یہ دن خود احتسابی کا بھی تقاضا کرتا ہے۔ اس بات پر غور کرنے کی ضرورت ہے کہ گزشتہ کئی دہائیوں کے دوران تحریک نے کیا کامیابیاں حاصل کیں، کن مشکلات کا سامنا کیا اور مستقبل کے لیے کون سی حکمت عملی اختیار کی جانی چاہیے۔ اختلافات اور باہمی کشمکش کے بجائے اتحاد، بصیرت، تدبر اور اجتماعی سوچ کو فروغ دینا وقت کی اہم ضرورت ہے۔تحریکوں کی کامیابی صرف جذبے سے نہیں بلکہ منظم منصوبہ بندی، مستقل مزاجی اور مشترکہ جدوجہد سے حاصل ہوتی ہے۔ سیاسی، سفارتی، ابلاغی اور دیگر تمام محاذوں پر مربوط اور مؤثر کردار ادا کیے بغیر مطلوبہ نتائج حاصل کرنا مشکل ہوتا ہے۔ اس لیے ضروری ہے کہ ماضی کی غلطیوں سے سبق سیکھا جائے اور مستقبل کے لیے ایک جامع اور قابلِ عمل لائحۂ عمل ترتیب دیا جائے۔یومِ شہدائے کشمیر ہمیں یاد دلاتا ہے کہ قربانیاں کبھی ضائع نہیں جاتیں۔ تاریخ گواہ ہے کہ ظلم کی عمر کتنی ہی طویل کیوں نہ ہو، آخرکار اسے شکست کا سامنا کرنا پڑتا ہے۔ شہداء کا خون آنے والی نسلوں کے لیے امید، حوصلے اور استقامت کا سرچشمہ بنتا ہے۔ آج بھی کشمیر کے شہداء کا پیغام یہی ہے کہ آزادی، عزت اور حق کے لیے جدوجہد جاری رکھی جائے اور اس مقصد کے حصول تک ہر ممکن کوشش بروئے کار لائی جائے۔
شہداء کو حقیقی خراجِ عقیدت یہی ہے کہ ان کے مشن کو زندہ رکھا جائے، اختلافات کو پسِ پشت ڈالاجائے، اجتماعی مفاد کو ترجیح دی جائے اور دیانت، اخلاص اور عزم کے ساتھ اس جدوجہد کو آگے بڑھایا جائے۔ وہ دن ضرور آئے گا جب کشمیری عوام اپنی قربانیوں کا ثمر پائیں گے اور تاریخ ایک بار پھر ثابت کرے گی کہ حق اور انصاف کی جدوجہد کو ہمیشہ دوام حاصل ہوتا ہے۔